partager
Seissanta ans après la desfacha occitana de Muret e la manmesa francesa, arriba lo revenge, segons Patrick Hutchinson, lo dramaturgue de La Crozada d’uei ; son cinquenc opus se debana en 1282 e aqueu còp en Sicilia, au lindau dau chaple dei Vèspras Sicilianas, qu’en dos jorns lo monde de l’Illa chapla uech mila sordats francés e provençaus.
Patrick Hutchinson ne’n fa l’acte finau de la crosada còntra leis Albigés, pretexte per conquistar lei país d’òc. Es que Carles 1er d’Anjau, Rèi de Provença s’èra entendut amé lo Papa, Gui Foulques, un Provençau tanben : que véncia Manfred, emperaire d’Allemanha, e serà fach Rèi de Sicilia, e de tot plen de territòris entre Constantinòpla e l’Albania, emai Napòls…
L'Istòria amb lei mejans dau siecle nòstre
Carles tua Manfred, mai son ambicion es sensa limitas, e per pagar sei guerras escracha lei Sicilians d’impòsts. La revòuta es pròcha… E Pèire d’Aragon l’espera per butar leis Angevins dau poder…
Coma d’acostuma Patric Hutchinson fa jugar l’istòria amb de mejans dau siecle nòstre, e tracta dei fake news o de la guerra d’Ucraïna per explicar leis enjuecs d’una super manipulacion politica facha fa uech siecles.
A l’ora d’ara sabèm pas onte e quora l’espectacle podrà èstre encara vist. Siguèt presentat as Ais lo 17 de setembre passat, a cent vint personas a la Ciutat dau libre.
A Marseille l'occitan (et d'autres idiomes) dit et chanté par des poètes d'un jour ou de toujours